Гаагада НАТО саммитинин жалпы жыйыны аяктагандан кийин АКШ президенти Дональд Трамп менен Украина президенти Владимир Зеленскийдин жолугушуусу өттү.
Зеленский Трамп менен узак жана мазмундуу сүйлөшүүлөрдү өткөргөнүн билдирди.
"Биз ок атышууну токтотуу жана тынчтыкка жетүү жолдорун талкууладык. Элибизди кантип коргоо керектиги тууралуу сүйлөштүк. Тынчтыкты жакындатууга көңүл буруп, жардам берүүгө даяр болгону үчүн АКШ президентине жана Кошмо Штаттарга ыраазычылык билдиребиз",- деп жазды Зеленский Телеграмдагы баракчасына.
Эки лидердин жолугушуусу 40 мүнөттөн ашык убакытка созулганы маалым болду.
НАТОнун Гаагадагы саммити башталар алдында Трамп журналисттердин Владимир Зеленский тууралуу суроолоруна жооп берген.
"Албетте, биз ортодогу кээ бир маселелерди талкуулайбыз. Анын айрым түйшүктөрү бар. Зеленский дурус жигит", – деди Трамп.
Bloomberg агенттиги мурдараак билдиргендей, Трамп НАТОдогу өнөктөштөрүнө Украинадагы абал "такыр көзөмөлдөн чыгып кетти" деп айткан жана бул багытта жигердүү аракеттерди талап кыларын белгилеген.
Буга чейин Канадада өткөн “Чоң жети” саммитинин алдында Трамп менен Зеленский жолугушары айтылган. Бирок Трамп ал саммиттен эрте кеткендиктен кездешүү болгон эмес.
26-апрелде тараптар Ватиканда Рим папасы Францисктин тажыясынын алдында жолуккан.
Эки президенттин февралда Вашингтондо өткөн жолугушуусу кайым айтышуу менен коштолгон.
НАТО Гаагада өткөн саммиттин жыйынтыгын жарыялады. Документ беш пункттан турат.
НАТОго мүчө өлкөлөр 2035-жылга чейин ички дүң продукциясынын (ИДП) 5% коргонууга жумшоого макул болушту. Анын ичинен 3,5% аскердик максаттарга, 1,5% инфраструктураны, санарип тармактарды коргоого жумшалат.
НАТО өлкөлөрү Украинаны колдоого кеткен чыгымды коргонууга жумшалган каражат катары эсептешет. Бул Киевге жардам берүүнү жеңилдетиши мүмкүн.
Документте Орусия "евроатлантикалык коопсуздукка коркунуч туудурат" деп гана айтылган. Согуш деген сөз колдонулган эмес.
Былтыркы саммитте "Украинанын НАТОго жолу ачык" деп айтылган болсо, быйылкы документте мындай билдирүү камтылбады.
АКШ президенти НАТО саммитиндеги сөзүндө альянска мүчө өлкөлөр коргонууга кеткен чыгымдарын ИДПнын 5% деңгээлине чейин көтөрсө, НАТО "өтө күчтүү" болорун билдирген. НАТОнун башкы катчысы Марк Рютте чыгымдарды 5% чейин жогорулатуу АКШ эмес, Европа өлкөлөрү менен Канаданын моюнунда болорун жана бардык өнөктөштөр муну колдоого даяр экенин белгилеген.
НАТОнун саммитти Нидерланддын Гаага шаарында 24-25-июнда өттү. Ага альянска мүчо болгон 32 өлкөнүн өкүлдөрү катышты.
Орусиянын армиясынын катарында Украинадагы согушка катышкан жаран Өзбекстанда 3 жыл 1 айга эркинен ажыратылды. Бул тууралуу Repost басылмасы өлкөнүн Избаскан райондук сотунун чечимине таянып кабарлады.
Соттун маалыматына ылайык, айыпталуучу жалданма аскер катары согушка катышып, мыйзамсыз аскердик кызматка тартылган жана чек арадан мыйзамсыз өткөн деп табылды.
Тергөөнүн маалыматы боюнча, ал 2019-жылы иштөө максатында Орусиянын Саратов шаарына кеткен. 2024-жылдын июнунда Орусиянын Коргоо министрлиги менен келишим түзүп, аскердик даярдыктан өткөн. Андан кийин июль-август айларында Украинадагы Луганск облусунда жана Волчанск шаарындагы согуштук аракеттерге катышкан. Ал согушта жаракат алып, дарылангандан кийин Өзбекстанга мыйзамсыз жолдор менен кайтып барган.
Айыпталуучу күнөөсүн моюнуна алып, орус паспортун алганын, бирок Өзбекстандын жарандыгынан баш тартпаганын айткан.
Бул Орусия тарапта Украинага каршы согушка катышканы үчүн өз мекенинде соттолгон биринчи өзбек жараны эмес.
Быйыл апрелде 51 жаштагы өзбекстандык жаран жалданмачылык боюнча айыпталып, беш жылга эркинен ажыратылган. 2025-жылдын январында дагы бир өзбек жараны Украинанын Бахмут аймагында согушка катышканы үчүн 4 жыл 2 айга эркинен ажыратылган. 2024-жылдын декабрында Куштепе районунун 22 жаштагы тургуну шарттуу түрдө 5 жылга камалган. Сентябрда “Вагнер” жалданма аскерлер компаниясында кызмат өтөгөн өзбек жараны 4 жылга кесилген. 2023-жылы октябрда дагы бир өзбек жаранына согушка катышкандыгы үчүн 3 жылга эркинен ажыратуу өкүмү чыккан.
Буга чейин "Хочу жить" Орусия согушка тарткан 1110 өзбекстандыктын аты-жөнүн аныктаган. Тизмедеги 109 киши урушта каза тапканы такталган. Согушка жөнөгөн өзбекстандыктардын эң кенжеси 21де, эң улуусу 61 жашта.
25-июнга оогон түнү Орусия Украинанын Запорожье жана Харьков облустарына "Шахед" дрондору менен сокку урду. Бул туууралуу жергиликтүү бийлик кабарлады.
Запорожье облусуна абадан төрт сокку урулуп, анын кесепетинен төрт адам жаракат алганын облустун аскердик администрация башчысы Иван Федоров билдирди. Маалыматка караганда, алардын биринин абалы оор. Облустун бутага алынган аймагында бир нече турак жай жана автоунааларды өрт чалганы маалымдалды.
Харьков шаарынын мэри Игорь Терехов билдиргендей, шаарга жети “Шахед” дрону менен сокку урулуп, бир адам жарадар болуп, ооруканага жаткырылды. Киев районунда жайгашкан жарандык ишкана жана турак жай жабыркады.
Харьков облусунун Купянск шаарында облус башчысы Олег Синегубовдун айтымында, беш адам жаракат алды. Көп кабаттуу турак үйгө зыян келтирилгени кабарланды.