Жекшембиде Орусиянын ар кайсы шаарларында түрмөдөгү оппозициялык саясатчы Алексей Навальныйды колдогон акцияларда кеминде 100 киши кармалганын "ОВД-Инфо" укук коргоо долбоору кабарлады. Кармалгандарды көбү Москвадан жана Петербургдан экени маалым болду. 4-июнда түрмөдө 47 жашка чыккан Навальныйга колдоо иретинде дүйнөнүн ондогон шаарында акциялар өттү. Навальный учурда Владимир облусунун Мелехово шаарчасындагы күчөтүлгөн тартиптеги түрмөдө тогуз жылдык жазасын өтөп отурат. Туулган күнүн оппозиционер түрмөнүн айып изоляторунда (ШИЗО) тосту.